Udako gauak itogarriak direnean, erronka zaila izan daiteke lo hartzea. Jira eta bira ibiltzen gara ohean, ohartu gabe atseden indarberritzaile baterako gakoa ez dela haizagailua edo aire girotua soilik, baizik eta baita afaltzeko jarri duguna ere.

Digestioaren eta gorputz-tenperaturaren arteko erlazioa

Lo sakonaren faseetan sartzeko, beharrezkoa da gorputzak barne-tenperatura gradu bat inguru jaistea; seinale hori erabiltzen du erloju biologikoak lora eragiten gaituzten mekanismoak aktibatzeko (halaxe diote loaren medikuntzako erakundeek, Loaren Espainiako Erakundeak, esaterako)

Arazoa da jateak berotasuna sortzen duela. Eta gantz ase kopuru handia duten afariak egiten baditugu, digestio-sistema jo eta ke lan egitera behartzen dugu. Gehiegizko esfortzu horrek oinarrizko tenperatura handitzen du, eta sabotatu egiten ditu lo egiten laguntzen diguten mekanismo biologikoak. Horregatik komeni da udan elikadura antiinflamatorio eta arin baten aldeko apustua egitea, lehentasunezkoa baita gorputza fresko mantentzea.

Udako afari baterako ondo datozen elikagaiak

Nutrients aldizkarian argitaratutako dietari eta loari buruzko artikulu batek dio jaki batzuek triptofanoa eta melatonina dutela, atsedenerako bidea prestatzen duten bi substantzia.

Gereziak, banana, kiwiak eta arrautzak aukera bikaina dira. Horrek ez du esan nahi besterik gabe logura eragiten dutenik, baina atsedenerako egokia den afari orekatu baten parte izan daitezke. Eta ez, arin afaltzeak ez zaitu ahulduko: ondo aukeratuz gero, mantenugai hauek egunean zeharreko zure energia-maila optimizatzen dute.

Hauexek dira aukera egoki batzuk:

• Gazpatxoa edo barazki-krema hotza.
• Entsalada konpletoa, arrautza, lekale, arrain edo oilaskoarekin.
• Arrain zuria edo urdina, barazkiekin.
• Tortilla frantsesa, tomatearekin edo kuiatxoarekin.
• Indioilarra, hornigai begetalarekin.

Zer komeni da mugatzea lotaratu aurretik?

Aurkako zerrendan daude ultraprozesatuak: Journal of Clinical Sleep Medicine aldizkarian argitaratutako azterlanek diote lotuta daudela azukre kopuru handia eta zuntz kopuru txikia duten dietak eta lo arina eta zatikatua, lo sakoneko tarte gutxiago duena.

Jaki minek liga berean jokatzen dute, beste bide batetik: azterlan batek egiaztatu zuen saltsa mina duen afari batek igo egiten duela gorputz-tenperatura loaren lehenengo zikloan, eta loaren kalitatea murrizten duela.

Alkoholari dagokionez, argi eta garbi hitz egiten du AESAN agentziak: alkoholak logaletu egiten du hasieran, baina, gero, zatikatu egiten du loaren arkitektura, REM fasea blokeatzen du eta gorputza deshidratatzen du gauean. Emaitza: sarriago esnatzea, eta atseden eskasagoa.

Laburbilduz, saihestu beharrekoak:

• Plater oso koipetsuak edo oparoak.
• Frijituak eta ultraprozesatuak.
• Jaki oso minak.
• 1.Alkohola
• Kafea, tea, kola-edariak eta bestelako kafeina-iturriak.
• Azkeneko orduan txokolate beltz asko jatea.
• Azukre kopuru handiko postreak.

Udako afari arin baterako adibideak

Beroaren aurkako afari on batek freskoa, asegarria eta erraz digeritzekoa izan behar du. Hasteko, bi ideia: entsalada bat kiwi, intxaur eta arrautza egosi zatitxoekin, edo plantxan prestatutako indioilar-broxetak, gazpatxo hotz-hotzarekin. Zenbat eta ur gehiago izan platerak, orduan eta hobeto: horixe da uda osasungarri baterako oinarria.

Kontsulta ezazu elikadura arin baterako gida hau, non udako zure menuetarako sasoiko produktu freskorik onenak hautatzen ditugun.

 

Zein da afari fresko bat egin eta etenik gabe lo egiteko zure plater gustukoena? Konta iezaguzu Facebooken, Twitterren,  Instagramen edo TikTok-en.

BM Kontuaren SMS komunikaziorik jaso nahi ez baduzu, harpidedun izateari utzi dezakezu zure profilean hemen sartuz edo 900 555 300 telefonora deituz.