Geure cookieak eta hirugarrengoenak erabiltzen ditugu gure webgunean erabiltzaileen nabigazioa aztertzeko eta hobetzeko, baita publizitate interesgarria eskaintzeko ere, betiere mezu hau onartu eta berariaz adostasuna ematen badiozu. Gure cookieen politikari buruz gehiago irakur dezakezu.

Zure kontua

  • Konektatzen...
BM SUPERMERCADOS

AKTUALITATEA

1. argazkia

Elikadura osasungarria

Patata vs Batata: Nutrizio-ezaugarriak eta sukaldean probetxua ateratzeko trukuak

Aurreko post-ean ikusi dugun bezala, badaude patataren eta batataren arteko alde fisiko batzuk. Aldeok txikiagoak dira barrutik, hau da, nutrizio-ezaugarriei dagokienez. Ikus dezagun zein ezaugarritan bat egiten duten:

  • Energia-iturri: Biak dira energia-iturri bikaina, karbohidrato kopuru handia baitute. Aspalditik, ospe txarra hartu dute tuberkuluek, “gizentzen duten jakiak” direla uste izateko joera dago eta. Hala ere, karbohidratoak oso garrantzitsuak dira dietan; egunean jaten ditugun kilokalorien %50-%60 inguru dira. Kopuru hori ez gainditzea da gakoa, hidratoak koipe modura pilatzen baitira.
  • C bitamina: C bitamina kopuru handia dute biek, eta bitamina hori garrantzitsua da immunitate ona izateko. Gainera, kolagenoaren sintesian parte hartzen du; gizakiaren gorputzean kopuru handienean dagoen proteina da kolagenoa, larruazalean, tendoietan eta lotailuetan, besteak beste.
  • B6 bitamina: Tuberkulu hauek bat datozen beste puntu bat da B6 bitamina kopuru handia dutela biek, egunean gomendatutakoaren % 20 inguru. Piridoxinak edo B6 bitaminak nerbioak eta larruazala osasuntsu izaten laguntzen du; infekzioei aurre egiten; odoleko azukre-maila egonkor mantentzen; eta odolean oxigenoaren zirkulazioa ahalbideratzen duten globulu gorriak sortzen.
  • Potasio kopuru handia: Patatak, batatarekin alderatuta, bitamina honen kopurua bikoizten duen arren (570 mg patatak, eta 320 mg batatak) batatak “potasio-iturri" nagusia den frutaren antzerako kopurua du: bananarena, hain zuzen ere. Potasioa lagungarria da nerbio-sistemak eta muskuluek ondo funtziona dezaten.
  • A bitamina: Kasu honetan, batatak soberan gainditzen du patata, 667 mikrogramorekin; kopuru horrek ia bete egiten du bitamina horren gomendatutako eguneko kantitatea. Dakigun bezala, erretinola edo A bitamina oso garrantzitsua da ikusmenak behar bezala funtziona dezan; gainera, larruazalaren, hezurren eta hortzen osagaietako bat da.

Orduan, zein da hobea?

Oro har, ez dago patataren eta batataren artean alde nabarmenik makro-mantenugaiei dagokienez, nahiz eta patatak batatak baino proteina gehixeago duen eta azukre gutxiago; nolanahi ere, hori aukeratzen dugun patataren araberakoa ere izango da.

Batatak, berriz, zuntz, A bitamina eta antioxidatzaile kopuru handiagoa du, eta potasio gutxiago. Bestalde, ikusi dugu biek dituztela ezaugarri onuragarriak, beraz, inolako arazorik gabe erabil daitezke elikadura aberats eta orekatu baten testuinguruan.

Nire aholkua: ahal den neurrian, sasoian sasoiko elikagaiak kontsumitzen saiatzea, eta patata urte osoan dugunez, batataren sasoia aprobetxa dezakegu (udazkena-negua) tuberkulu goxo honetaz gozatzeko, eta gure platerak pixka bat aldatzeko.

Ba al zenekien…

Patatak eta batatak duen C bitaminaren eta potasioaren zati bat egosterakoan galtzen dela? Galera horiek, baina, murriztu ditzakegu, labean tenperatura txikian erreta (140 ºC) edo lurrunetan azal eta guzti egosita.

Egin ezazu proba: moztu itzazu patatak laukitxotan edo txip erara, nahastu oliba-olio birjina estra pixka batekin eta gustuko dituzun espeziekin (gatza, piperbeltza, kuminoa, piperrauts mina, oreganoa…) eta egin labean. Frijituta baino askoz koipe gutxiago izango dute era horretan, eta goxo-goxoak daude, haragiarekin edo arrainarekin jateko, baita entsaladei gehitzeko ere.

  Rocío Narbaiza: Farmazialaria & Nutrizionista