Zure kontua

  • Konektatzen...
BM SUPERMERCADOS

AKTUALITATEA

1. argazkia

Aholkuak

Insomnio arazoak: nola egin aurre modu naturalean

Lo egiteko arazoak dira pandemia honen ondorio garrantzitsuenekoak. Hain zuzen ere, azkeneko hilabeteotan izugarri handitu da insomnioaren aurkako produktuen salmenta; izan ere, COVIDak sortutako estresak eta etorkizun hurbilari buruzko ziurgabetasunak eragina du loaren kalitatean eta kantitatean.

Baina kontuan ez da lo egitea soilik, baizik eta ondo eta behar adina ordu lo egitea, hau da, loa indarberritzailea izan dadin lortzea. Gutxi lo egiteak bizi-kalitatea kaltetzen du: murriztu egiten da adimen-errendimendua, umoreari eragiten dio, eta zerikusia du hipertentsioarekin, antsietatearekin eta, are, pisua handitzearekin.

Zer egin dezakegu gehiago eta hobeto lo egiteko?

Lehenik eta behin, garrantzitsua da lo-higieneko neurri egoki batzuk ezartzea, hots, kalitatezko loa lortzera bideratutako ekintzak, behar bezala atseden har dezagun; besteak beste, honako hauek aipa daitezke:

  • Lo-ordutegi erregularrak mantentzea: ordu berean oheratzea eta, gutxienez 8 ordu lo egin ondoren, ordu berean jaikitzea.
  • Gailu elektronikoak deskonektatzeko ordu bat ezartzea, eta lotarako baino lehen jarduera erlaxagarriagoak egitea, hala nola irakurtzea edo meditatzea.  
  • Lotaratu baino gutxienez bi ordu lehenagotik, substantzia kitzikagarriak ez kontsumitzen saiatzea (besteak beste, alkohola, tabakoa eta kafea).
  • Oheratu baino lehen jarduera fisikoa egitea: pertsona batzuengan urduritasuna eragin dezake, eta lo hartzea eragotzi dezake.
  • Arin afaltzea, oheratu baino gutxienez bi ordu lehenago. Ez da gomendagarria lotara gosez joatea ere; afaldu ondoren gose-sentsazioa izanez gero, aukera egokia da basokada bat esne edo infusio bat hartzea.
  • Giro egokia izatea: tenperatura eta aireztapena egokiak izatea, zaratak eta argiak saihestea, etab.

Horrez gain, oheratu baino ordu erdi lehenago infusio erlaxagarriren bat hartzea ere izan daiteke beste neurri bat. Gehienak proportzio ezberdinetan ezaugarri erlaxagarriak, antsiolitikoak eta hipnotikoak dituzten landarez prestatuta daude: Belar bedeinkatua, garraiska, pasio-lorea, elorri zuria, Kaliforniako mitxoleta, etab.

Ahalmen erlaxagarriak dituzten landareen estraktu horiek (belar bedeinkatua, pasio-lorea, garraiska, elorri zuria, etab.) konprimatu moduan ere aurki daitezke, konbinazio eta kontzentrazio ezberdinetan.  Lo egiteko erabiltzen direnak izan ohi dira osagai horien kontzentrazio handiena dutenak eta, oro har, oheratu baino ordu erdi edo ordubete lehenago hartzea gomendatzen da

Gaur egun, gero eta gehiago erabiltzen da melatonina ere, iluntzen denean burmuinak sortzen duen hormona bat, loaren prozesu naturalean esku hartzen duena. Hainbat faktorek (estresak, bidaiek, txanda-aldaketek, adinak, etab.) eragin dezake hormona horren ekoizpena eta, ondorioz, loa asaldatu.  Hormona hori behar bezala sortzen ez denean, melatoninaz prestatutako osagarriek loaren zikloak erregulatzen lagun dezakete.

Oinarrian hormona hori duen osagarri ugari dago; horietako batzuek melatonina bakarrik dute eta, beste batzuek, lo hartzen laguntzen duten landareak ere badituzte. Epe laburrean melatonina erabiltzeak segurua dirudien arren, gomendagarria da beti medikuari edo farmazialariari kontsultatzea hartzen hasi baino lehen, ez baita eraginkorra kasu guztietan.

Aipatu bezala, arrazoi ugari egon daiteke insomnioaren atzean, eta medikuak esan behar du arrazoiok zein diren, eta hark ezarri beharko du tratamendurik egokiena. Hala ere, lo-higieneko neurriak eta eguneroko errutinak ezartzea da loaren nahasmenduen tratamenduaren oinarria.

  Rocío Narbaiza: Farmazialaria & Nutrizionista