Bizitzako gainerako etapetan bezala, haurdun gelditu baino lehen eta haurdunaldian ere funtsezkoa da bizitza-estilo osasungarria izatea. Dieta orekatua eta bizitza-ohitura onak izateak murriztu egiten dute haurdunaldian zein erditu ondoren arazoak izateko arriskua, eragina baitute, ez emakumearen pisuan eta haurtxoaren garapenean soilik, baizik eta baita jaioberriak etorkizunean gaixotasunak izateko arriskuan ere.

Haurdun dagoen emakumearen dietan falta ezin direnak:

• Karbohidratoak: Eguneko energia osoaren % 50-55 inguru izan behar dira, eta iturri osasungarrietatik datozenak, hala nola, zereal integralak, lekaleak, tuberkuluak, frutak eta barazkiak, etab.
• Proteinak: ezinbestekoak dira ehun berrien sintesirako eta, beraz, garatzen ari den haurtxoaren hazkuntzarako. Proteina animalia- edo landare-jatorrikoa izan daiteke: haragiak, arrainak, arrautzak, lekaleak, fruitu lehorrak, haziak, tofua, etab.
• Kalitatezko koipeak: umekiaren nerbio-sistemaren garapenean esku hartzen dute koipeek. Lehentasuna eman behar zaio koipe asegabeak –eta ez aseak– kontsumitzeari; hau da, oliba-olio birjina, ahuakateak, fruitu lehorrak, haziak, arrain koipetsu txikiak, etab.
• Frutak eta barazkiak: egunean bost errazio fruta eta barazki jan behar da; hori izango da zuntz, bitamina eta mineral ekarpen nagusia. Zuku edo irabiakietan baino, hobe da aleak osorik jatea; horrela, gehiago aseko gara eta, gainera, gluzemia-mailetan bat-bateko aldaketak gerta daitezen saihestuko dugu.
• Zuntza: garrantzitsua da zuntz kopuru handiko jakiak kontsumitzea, umetokiaren tamaina handitzearen eta hormona-aldaketen ondorioz sortu ohi den idorreria saihesteko. Zuntz kopuru nabarmena dute frutek eta barazkiek, zereal integralek, lekaleek eta haziek –lihoaren, txiaren eta kuiaren haziek, esaterako–, etab.
• Ura: egunean gutxienez bi litro ur edateak organismoa behar bezala hidratatzen eta idorreria prebenitzen laguntzen du.
• Esnekiak edo landare-edari aberastuak: kaltzio eta A eta D bitamina kopuru onak eskaintzen dizkigute.

Dieta orekatua izanez gero, pisu egokia irabaziko du emakumeak, izan ere, kontua ez da –esan ohi den bezala– birentzako jatea. Hain zuzen ere, energia-beharrak ez dira aldatzen haurdunaldiaren lehenengo erdian; bigarrenari dagokionez, ordea, erakunde batzuek gomendatzen dute energia kopurua pixka bat bakarrik handitzea –egunean 200 edo 300 kilokaloria–, bakoitzaren apetituaren eta beharren arabera. Haurdunaldi osoan gehienez 16 kilo irabazi beharko luke emakumeak, baldin eta abiapuntuko pisua egokia bada.

Haurdunaldian jarduera fisikoa modu erregularrean egiteak, etapa honetan pisu gehiegi irabaztea prebenitzeaz gain, hipertentsioa eta haurdunaldiko diabetesa prebenitzen ere laguntzen du. Gainera, gorputza erditzerako prestatzen du, eta gogo-aldartea hobetu.

Horregatik, egunean 30 bat minutuz jarduera fisikoa egitea gomendatzen da –modu neurritsuan–, astean bost egunez; hala nola erritmo onean oinez ibiltzea, igeri egitea, yoga, pilates eta astean egun batean edo bitan, indarra hartzeko ariketak. Egokiena da profesional batek diseina dezan kasu bakoitzerako errutinarik aproposena.

Azkenik, garrantzitsua da elikadura-osagarriei arreta eskaintzea. Medikuak agindu beharko ditu kasu bakoitzerako gehigarri egokiak, baina, oro har, haurdunaldian handitu egiten dira bitamina eta mineral batzuen beharrak, hala nola azido folikoarena, iodoarena eta B12 bitaminarena; beraz, baliteke emakumeak aparteko laguntza behar izatea.