Koipetan baxuak diren eta mantenugaietan aberatsak diren elikagaiak aukeratzea. Hau da, gure dietan asetzen duten eta gizentzen ez duten elikagaiak sartzea. Hori da nutrizio osasungarriaren funtsa. Erraza dirudi, ezta? Batzuetan aurrean izaten ditugu eta ez gara ohartzen. Hori da txipiroien kasua, aprobetxatzea komeni den sasoiko produktua.

Txipiroi hitza tamainu txikiko edozein txibi izendatzeko erabiltzen da. Teknikoki zefalopodoak dira, moluskuen familiako ornogabe mota bat, olagarroak edo sepiak bezala.

Sukaldaritza mediterranearraren errezeta askoren protagonista izateaz gain, txipiroiak aukera ona dira nutrizioaren ikuspegitik. Balio biologiko handiko proteina asko eskaintzen dituzte (17 g 100 g-ko), eta Omega-3 gantz-azido asegabeetan aberatsak dira, bihotza zaintzen laguntzen dutenak.

Era berean, kaloria gutxiko elikagaiak dira (82 kal. 100 g-ko) eta beraz, ezin hobeak argaltzeko edo pisua mantentzeko helburua duten dietetan sartzeko.

Mineralak ere baditu. Fosforoa, iodoa eta selenioa nabarmentzen dira eta neurri txikiagoan, kaltzioa eta burdina. Selenioa B bitaminarekin lotutako antioxidatzaile bat da, iodoak metabolismoaren funtzionamendurako funtsezkoak diren tiroide-hormonen sintesian esku hartzen duen bitartean.

Txipiroien beste puntu aipagarri bat bitaminak dira, bereziki B taldekoak (B3, B12). Txipiroi errazio batek gomendatutako B12 bitaminaren eguneko kantitatearen % 100 ematen du (immunitate-sistema indartzen du).

Hori bai, txipiroiak kolesterolean aberatsak dira eta beraz, maila handiak dituztenek noizean behin jan behar dituzte.

Kontserbatzeko aholku batzuk

Txipiroiak eta txibiak, sepiak, makaltxoak edo olagarroak bezalako beste zefalopodo batzuk,  produktu bikaina dira fresko erabiltzeko. Onena ahalik eta denbora laburrenean kontsumitzea da, haien zapore eta ezaugarri guztiez gozatzeko, ahal dela egun berean.
Freskoan hobeto kontserbatzeko (izoztuak 6 hilabete arte irauten dute ondo) hozkailuan gorde daitezke, sareta duen ontzi batean, ur gainean bota ez dadin, eta oihal heze batekin estalita, lehor ez daitezen.