Deshidratazioa gertatzen da gorputzak kanporatzen duen likido kopurua gorputzean sartzen dena baino handiagoa denean. Haurren kasuan, sarriago gertatzen da 2 urtez azpikoen artean, oro har nahikoa likido edaten ez dutenean (edoskialdi gutxi, gaizki prestatutako biberoiak, etab.) edo gastroenteritis baten ondorioz (beherakoa edo botaka).

Uda sasoi honetan bero egiten du, hezetasuna areagotzen da eta bidaiak egiten ditugu –askotan, ohituta gaudenarekin alderatuta oso bestelakoa den klima duten lekuetara–; horregatik, kontu berezia izan behar dugu, eta sarri eskaini behar diegu ura, ez daitezen deshidratatu.

Gainera, deshidratatzeko joera handiagoa dute haurtxoek, txikiagoak direlako eta likido-erreserba gutxiago dutelako. Gizakiaren gorputzaren  % 60 inguru ura da (% 75 jaioberrien kasuan), eta deshidratazioarekin elektrolitoak ere galtzen dira (sodioa, potasioa, kloroa, kaltzioa, etab.), funtsezkoak direnak organismoak behar bezala funtziona dezan, eta garrantzitsua da horiek birjartzea.

Arintzat jotzen da gorputzeko likidoaren % 5 galtzea; % 10era arte, moderatutzat; eta, %15eko galera, berriz, larritzat.

Nola azaleratzen da?

Ezagut itzazu ondo deshidratazioaren ohiko sintomak, horiek identifikatzen jakin dezazun:

• Logura edo suminkortasuna.
• Larruazal hotz eta izerditsua.
• Ahultasuna.
• Malko falta negar egiterakoan.
• Sukarra.
• Ezpain lehorrak.
• Aho eta mingain lehorrak.
• Begiak edo fontanela (haurtxoaren buruko zona bigunak) konkatuta.
• Pixa gutxi edo batere ez.
• Pixa horixka.
• Gorozki lehorrak eta gogorrak.

Deshidratazioaren tratamendua haurtxoetan

Garrantzitsuena: nola jokatu deshidratazio kasuetan. Gonbitoek edo beherakoak eragindakoa baldin bada, ahoz hartzeko hidratazio-soluzioak erabiltzea da gomendagarriena: 5 eta 10 ml artean haurrak duen kilo bakoitzeko, eta gorozki-aldi edo gonbito bakoitzeko, Pediatriako Espainiako Elkarteak (AEDP) azaltzen duenari jarraiki.

Bero-kolpe batek eta likido gutxi edateak eragindakoa baldin bada, onena da ura eskaintzea, betiere sei hilabete baino gehiago baldin badu. Bularreko haurren kasuan, bularra sarriago eskaintzeaz gain, edoskialdien artean hidratatzeko soluzio bat eman dakieke; halaber, biberoia hartzen dutenei harraldia baino lehen seruma ematea komeni da.

Ura!(baita frutak eta barazkiak ere)

Ura da haurtxoak hidratatzeko aukerarik onena. Baita frutak eta barazkiak ere –baldin eta horiek kontsumitzeko adina baldin badute–, izan ere likido-portzentaje handia, mineralak eta bitaminak dituzte, izerdiarekin galdutako likidoa berreskuratzeko. Adinaren araberakoa da haur batek hartu behar duen ur kopurua:

• 6 hilabete arte: 800 bat mililitro egunean (ama-esnearekin edo formula-esnearekin).
• 7-12 hilabete: 800 mililitro eta litro bat artean egunean (ama-esnea eta edari osagarriak).
• Urtebetetik 2 urtera: 1,2 litro egunean
• 2 urtetik 3 urtera: 1,3 litro egunean