Aligotaren gure bertsio propioa prestatuko dugu; patata-purea eta Frantziako gazta tipikoa, txerri-azpizunarekin aurkezteko

OSAGAIAK

(4 pertsonarentzat)
1 azpizun txerri iberiko
100 gr patata
50 gr mozzarella
50 gr brie gazta
1 atal baratxuri
200 ml ur
20 ml esnegain
20 gr gurin
50 gr mahats

PRESTATZEA

Patata uretan egosiko dugu, su geldoan bigun-bigun egon arte (20 eta 40 minutu artean, patataren tamainaren arabera). Ur guztia xukatu duenean, mozzarella, brie gazta, baratxuri xehatua, esnegaina eta gurina gehituko diogu.

Guztia birrinduko dugu irabiagailuarekin, masa elastiko eta homogeneoa lortu arte. Emaitza berotan mantenduko dugu.

Azpizuna medailoitan zatituko dugu, eta zartaginean markatuko dugu. Pixka batean salteatuko dugu zartagin berean mahatsekin batera. Guztia platerean jarri, eta purearekin batera zerbitzatuko dugu.

PREZIOA: ERTAINA
DENBORA: 45’
ZAILTASUNA: 5/10
OSASUNGARRIA: 6/10