Kirola egiten badugu –batez ere maila profesionalean–, elikadura entrenamenduak eurak bezain garrantzitsua da. Proteina eta bitamina kopuru handiko dieta egoki batek kirol-errendimendu on bat lortzeko beharrezko energia eta mantenugaiak ematen dizkigu.

Dieta horretan, eta osagarri modura, ez da falta behar haragi-errazioren bat. Astean hiru aldiz 100 eta 150 gramo arteko kopurua gomendatzen da, horietako bi errazio gutxienez, haragi zuriarenak. Horien artean, oilaskoa eta indioilarra dira estimatuenak. Hauexek dira arrazoi nagusiak:

• Proteina-balio handia dute:% 30 inguru. Ezin hobeak dira pisua kontrolatzeko eta kirolarien dietetan (muskulu-masarako). Osasunaren Mundu Erakundeak gorputz-pisuaren kilogramo bakoitzeko 0,8 gramo proteina kontsumitzea gomendatzen du.
  • Oilaskoa: 27 gramo (100 gramo bakoitzeko)
  • Indioilarra: 29 g.
• Gantz kopuru txikia dute:Atalaren arabera aldatu egiten den arren, % 10 inguruko gantz-portzentajea dute; monoasegabeak eta poliasegabeak dira nagusi (gantz osasungarriak).
  • Oilaskoa: 14 g.
  • Indioilarra: 7 g.
• Kaloria kopuru txikia ematen digute: 200 kilokaloria inguru, 100 gramo bakoitzeko. Oilasko-haragiak indioilarrarenak baino kaloria gehixeago du.
  • Oilaskoa: 239 kilokaloria (100 gramo bakoitzeko)
  • Indioilarra: 189 kilokaloria

Bitaminak eta mineralak:balantzari alde batera edo bestera egiten diote?

Oro har, indioilarrak oilaskoak baino kaloria eta gantz kopuru txikiagoa du, eta hori garrantzitsua izan daiteke argaltzeko dietetan. Gainera, proteina gehixeago eskaintzen digu, beraz, egokiagoa da kirol-dietetarako.

Baina, zer gertatzen da bitamina eta mineralekin? Horiek oilaskoaren alde egiten al dute? Biek dituzten arren B taldeko bitamina eta mineral dosi ederra (magnesioa, burdina, kaltzioa, potasioa, etab.) –egoera neuromuskularrerako eta nerbio-sistemarako onuragarriak, oro har–, parametro horietako gehienetan ere indioilar-haragia gailentzen da. Adibidez, indioilarrak B6 bitamina kopuru bikoitza eta B12 hirukoitza du oilaskoarenarekin alderatuta (0,6 µg eta 0,4 µg, eta 1 µg eta 0,3 µg, hurrenez hurren).

Beraz, esan dezakegu indioilar-haragia dela partidu honetako irabazlea, alde txikiarekin bada ere, kirol-dietaren ikuspuntutik. Hala ere, oilaskoa (bularkia batez ere) aukera bikaina da mantenugai-iturria aldatzeko.

Beti bezala, funtsezkoa da indioilarra edo oilaskoa prestatzeko modua. Hobeto plantxan edo lurrunetan prestatzea.