Cajuko gaztainak eta Indiako intxaurrak ere deitzen zaizkie anakardoei: jatorriz Venezuelakoa eta Brasil ipar-ekialdekoa –Amazonako eskualdea– den zuhaitz baten fruituak dira, baina gaur egun mundu osora hedatuta dago haien kontsumoa.

Fruitu lehorren barruan sartzen dira –eta badakigu denek dutela kaloria kopuru handia (574 kcal inguru 100 gramo bakoitzeko), baina nutrizioaren aldeko oso aberatsak ere badira, beste fruitu lehor batzuekin ikusi genuen bezala, pistatxoekin, esaterako. Horregatik, ez diogu anakardoak jateari muzin egin behar, are egunero kontsumi ditzakegu (beste edozein fruitu lehor bezala), beti ere kantitate egokiak errespetatuz: hau da, egunean 20 gramo gehienez, 15 bat anakardo.

Beraz, kantitatea kontrolatzen jakin behar da kaloria gehiegi ez kontsumitzeko eta, bestalde, ondo mastekatu behar dira indigestioak saihesteko eta mantenugaien asimilazio azkarra lortzeko.

Anakardoak (eta fruitu lehorrak, oro har), mokadurik onena

Jaki horren dohainak ahalik eta gehien aprobetxatzeko, gosaritan jan ditzakegu, beti etortzen baita ondo eguneko lehenengo otorduan energia estra bat gehitzea, edo bazkaritan, entsaladan jan ditzakegu.

Aperitibo modura ere har daitezke: anakardo eskukada bat gantz ase kopuru handia duten elikagaiak baino askoz aukera osasungarriagoa da, hau da, hestebeteak, gaztak eta, nola ez, edozein snack edo opilgintza-produktu baino askoz hobea. Mokadu osasungarria dira anakardoak: nahikoa da kantitate txiki bat asetzeko, eta horrek gure burua zaintzen laguntzen digu.

Bestalde, gantz monoasegabe eta poliasegabe ugariko jakia da (% 46), HDL kolesterol ona hobetu eta LDL kolesterol txarra murrizten duena. Hainbat ikerketak ondorioztatu du anakardoak kontsumitzeak arazo kardiobaskularrak (infartuak eta apoplexiak) murrizten laguntzen duela, are, baita tumore-sorkuntzatik babesten ere.

Hala ere, eta konparazio batera, hobea da intxaur eta arbendola naturalen lipido-profila.

Anakardoek proteina (% 15) eta zuntz (3 gramo) kopuru handia dute, bai eta xurgatze mantsoko karbohidrato ugari ere (% 32); horri esker, odoleko azukre-maila egonkor mantentzen laguntzen dute, eta horrek gose sentsazioa handitzen duen eta, kirolarien kasuan, errendimendu fisikoa murrizten duen azukre-mailaren jaitsierak murrizten ditu.

Beraz: 15 anarkado nahikoa dira...

• Asetzeko: gakoa da fruituok ondo mastekatzea, presarik gabe. Zenbat eta azkarrago jan, orduan eta kaloria gehiago hartzen du gorputzak eta denbora gutxiago ematen diozu gorputzari ase dadin.
• Gaixotasun kardiobaskularrak prebenitzeko: anakardoen gantz motak kolesterol ona hobetu eta kolesterol txarra murrizten du.
• Tumoreen aurka babesteko: gure zelulak estres oxidatzailetik babesten dituzte.
• Glukosa-mailak mantentzeko: beste fruitu lehor batzuk bezala, oso gomendagarriak dira kirola egiten dugunerako, odoleko glukosa-maila egokia mantendu, errendimendu fisikoa hobetu eta gihar-minei aurre egiten baitiete.
• Garun- eta adimen-errendimendu hobea izateko: bitamina (B1, B2, B6, B9 –azido folikoa-, A, C, E, D) eta mineral (burdina, fosforoa, zinka, magnesioa, kobrea eta kaltzioa) ugari baitute.

Dra. Marta Aguirre. Nutrizioa y Medikuntza estetikoa